Жобалық офис Боннда өтетін БҰҰ Климаттық конференциясында өңірлік климаттық бастамаларды ұсынады
2025 жылғы 16-26 маусым аралығында Боннда өтетін Біріккен Ұлттар Ұйымының Климаттың өзгеруіне арналған шеңберлік конвенциясының (UNFCCC) Қосалқы орган сессияларының 62-ші отырысы аясында Орталық Азия бойынша Климаттың өзгеруі мен Жасыл энергетика жөніндегі Жобалық офис өңірлік климаттық әрекеттерді күшейтуге және 2026 жылы Астанада өтетін өңірлік экологиялық саммитке дайындықты қамтамасыз ету мақсатында маңызды жанама іс-шара ұйымдастырады.
UNFCCC SB62 туралы
SB62 сессиясы – Париж келісімінің іске асырылуы бойынша техникалық және ғылыми мәселелерді талқылау үшін Жыл сайынғы тараптар конференциясына дейінгі маңызды аралық сессия. Бұл шара бейімделу, эмиссияны азайту, климаттық қаржыландыру және басқа да өзекті мәселелер бойынша тәжірибе алмасу, ынтымақтастықты нығайту және жаһандық климаттық күн тәртібін қалыптастыру алаңы болып табылады.
Жобалық офистің UNFCCC SB62-дегі рөлі
RES 2026 Жобалық офисі SB62 сессиясына белсенді қатысып, оны Орталық Азияның өңірлік климаттық күн тәртібін ілгерілетуге арналған стратегиялық алаң ретінде пайдаланады. Бонндағы қатысуы Орталық Азия елдерінің экологиялық мәселелерді шешуде бірлесіп жұмыс істеуге деген ұмтылысын көрсетеді.
RES 2026-ға дайындық бойынша бесінші консультация: Боннда жанама іс-шара
2025 жылғы 20 маусым, Бонн, Германия
«Климаттық өңірлік әрекеттерді жеделдету: 2026 жылғы Өңірлік экологиялық саммитке қарай» атты тақырыппен өтетін бесінші дайындық консультациясы. Бұл іс-шара өңірлік кездесулер сериясының логикалық жалғасы болып табылады. Алдыңғы төрт консультация халықаралық маңызды шаралар аясында сәтті өтті.
Бұл жанама іс-шара Қазақстан Республикасының Президенті Қ.К. Тоқаевтың Біріккен Ұлттар Ұйымымен серіктестікте бастаған өңірлік ынтымақтастық процесінің маңызды кезеңі болып табылады. Процестің мақсаты – Орталық Азия елдері үшін климаттың өзгеруіне қарсы бірлескен тәсілдер мен нақты механизмдерді әзірлеу, оның шыңы 2026 жылғы ӨЭС Астанада өтеді.
Консультация барысында қаралатын мәселелер:
- RES 2026-ның Орталық Азия елдерінің климаттық мәселелер бойынша бірлескен тәсілдерін үйлестіру үшін негізгі өңірлік алаң ретіндегі маңызы.
- Климаттық дипломатияны нығайту және өңірдегі тұрақты даму жобаларын ілгерілету.
- Өңірлік әрекеттерді жаһандық климаттық процестермен үйлестіру.
Қатысушылар
Қазақстан, Қырғызстан, Тәжікстан, Түрікменстан, Өзбекстан елдерінің экология, экономика және қаржы министрліктерінің өкілдері, сондай-ақ Әзербайжанның Сыртқы істер министрлігі, БҰҰ РКИК, ЭЫДҰ, Дүниежүзілік банк, ЕБРР және басқа халықаралық ұйымдардың өкілдері қатысады. Іс-шарада Қазақстан Республикасының Экология және табиғи ресурстар вице-министрі мырза Ошұрбаев құттықтау сөзін айтады.
