Орталық Азия климаттың өзгеруі жөніндегі конференциясының (ОАКӨК-2026) ашылуы. «Ұлттық деңгейде айқындалатын салымдар (ҰДАҮ) 3.0: Міндеттемелерден әрекеттерге»

Өңірлік экологиялық саммит алаңында бейінді мемлекеттік органдар мен халықаралық ұйымдардың басшылары климаттық саясаттың негізгі басымдықтарын, қаржыландыру қажеттіліктерін және ҰДАҮ 3.0 орындалуын күшейту мүмкіндіктерін талқылады.

Орталық Азия елдерінің өкілдері Париж келісімі аясындағы өз міндеттемелерінің, соның ішінде 2035 жылға дейінгі кезеңге арналған ҰДАҮ 3.0 жаңартылған ұлттық деңгейде айқындалатын салымдарының дәйекті түрде жүзеге асырылып жатқанын атап өтті.

ҰДАҮ 3.0 — бұл тек бағдарлар жүйесі ғана емес, сонымен қатар тұрақты қаржыландырудың жұмыс істейтін құралдарын және экономика секторлары арасындағы үйлестіруді талап ететін нақты іс-қимыл күн тәртібі.

«Қазақстанда 2060 жылға дейінгі көміртектік бейтараптыққа қол жеткізу стратегиясын іске асыру жөніндегі жол картасы әзірленіп жатыр. Ол климаттық шешімдерді экономиканың барлық негізгі секторларына интеграциялауды және төмен көміртекті дамуға көшу үшін ресурстарды жұмылдыруды қарастырады», - деді Қазақстан Республикасының Экология және табиғи ресурстар вице-министрі Мансұр Ошурбаев.

Қазақстанда 10 жылдан астам уақыт бойы шығарындылар саудасы жүйесі жұмыс істейді. Жүйені халықаралық тәжірибелер мен Еуропалық Одақ тәсілдерін ескере отырып жетілдіру жалғасып жатыр. 

«Бұл ішкі көміртегі нарығын дамыту үшін де, сондай-ақ жаңа сыртқы талаптарға, соның ішінде көміртекті реттеуге бейімделу үшін де маңызды», - деп толықтырды сөзін Ошурбаев.

Қырғызстан, Тәжікстан және Түрікменстан өкілдері өз елдеріндегі ҰДАҮ 3.0-дің дәйекті түрде орындалуы туралы айтып берді.