ӨЭС 2026 аясында таулы өңірлердің тұрақты даму мәселелері талқыланады
Қырғыз Республикасының Табиғи ресурстар, экология және техникалық қадағалау министрлігі республиканың өзге ұйымдарымен бірлесіп, 2026 жылғы 22–24 сәуір аралығында Астанада өтетін Өңірлік экологиялық саммит аясында таулы өңірлердің тұрақты дамуы саласындағы жаһандық және өңірлік ынтымақтастықты нығайту мәселелеріне арналған сессия өткізеді.
«Таулар және климаттың өзгеруі: осалдықтан тұрақты дамуға» атты жоғары деңгейдегі сессия 23 сәуірде өтеді. Іс-шараға табиғатты қорғау ведомстволарының басшылары, Біріккен Ұлттар Ұйымының, Дүниежүзілік банктің, Азия орман шаруашылығы ынтымақтастығы ұйымының өкілдері және сарапшылар қатысады.
Таулы өңірлер Жер шарының құрлық аумағының 27%-ын алып жатыр және әлем халқының 50%-дан астамын тұщы сумен қамтамасыз етеді, экожүйелерді сақтау мен азық-түлік қауіпсіздігін қамтамасыз етуде маңызды рөл атқарады. Алайда олар климаттың өзгеруіне ең осал аумақтардың қатарына жатады.
Мұздықтардың жедел еруі, экожүйелердің деградациясы, табиғи апаттардың (көшкіндер, сел тасқындары, су тасқындары) жиілеуі, сондай-ақ таулы қауымдастықтардың әлеуметтік-экономикалық осалдығы жедел әрі кешенді шараларды талап етеді.
Соған қарамастан, таулы өңірлер күн тәртібі жаһандық климаттық процестерде, соның ішінде қаржыландыру, саясат және технологиялар салаларында жеткілікті деңгейде көрініс таппай отыр.
Іс-шараның мақсаты – климаттың өзгеруі жағдайында таулы өңірлердің тұрақты дамуына кешенді тәсілді қалыптастыруға жәрдемдесу, таулы өңірлер мәселелеріне саяси назарды күшейту, тұрақты және бейімделу шешімдерін ілгерілету, сондай-ақ ынтымақтастықты дамыту.
Сессия таулы өңірлердің тұрақты дамуына қатысты келісілген тәсілдерді әзірлеуге, климаттық қаржыландыруды жұмылдыруға және жаһандық климаттық сын-қатерлер жағдайында өңірлік және халықаралық ынтымақтастықты нығайтуға арналған маңызды алаңға айналады деп күтілуде.
