CACCC. Орталық Азия елдерінің стратегиялық жоспарлауына климаттық тәуекелдерді басқаруды интеграциялау

Бүгін Астанадағы Өңірлік экологиялық саясат (РЭС) аясында климаттық тәуекелдерді басқарудың жүйелі тәсілін дамытуға арналған «CACCC. Орталық Азия елдерінің стратегиялық жоспарлауына климаттық тәуекелдерді басқаруды интеграциялау»тақырыбында сессия өтті.

Қатысушылар тәуекелдерді бағалау нәтижелерін мемлекеттік саясатқа, бюджеттік және инвестициялық жоспарлауға интеграциялау мәселелерін, сондай-ақ ерте ескерту жүйелері мен сақтандыру тетіктерін дамытуды талқылады.

Кездесудің басты нәтижесі — өңірдің ұзақ мерзімді тұрақтылығының негізін қалауға бағытталған климаттық тәуекелдерді басқару бойынша өңірлік жол картасын келісу жөніндегі жұмыс болды.

Сессия модераторы, Орталық Азиядағы Біртұтас денсаулық» өңірлік бағдарламасының жетекшісі, GIZ Сергей Макаров сын-қатердің ауқымын атап өтті.

«Климаттық тәуекелдер қазірдің өзінде су ресурстарына, ауыл шаруашылығына, энергетикаға, көптеген елдерде жаңартуды талап ететін инфрақұрылымымызға, халықтың денсаулығына және жалпы экономикамыздың тұрақтылығына әсер етіп жатыр. Сондықтан қазір мәселе тек экологиялық күн тәртібінде ғана емес, мемлекеттік басқарудың сапасы, өңірлік тұрақтылық, ұзақ мерзімді жоспарлау және жалпы дамуымыздың орнықтылығы туралы болып отыр», — деп атап өтті ол.

Сарапшылар Орталық Азияның әлемдегі ең жылдам дамып келе жатқан аймақтардың бірі ретіндегі мәртебесі энергетикалық, су және азық-түлік жүйелерінің қауіпсіздігіне ерекше назар аударуды талап ететінін жеткізді.

БҰҰ Бас хатшысының апаттар тәуекелін азайту жөніндегі арнайы өкілі және БҰҰ-ның Апаттар тәуекелін азайту басқармасының басшысы Камал Кишор тәуекелдерді кешенді басқару тұжырымдамасына көшу арқылы жоспарлау көжиегін кеңейтуді ұсынды.

«Бұл аймақтың көптеген елдерінде геофизикалық құбылыстардың, мысалы, жер сілкіністерінің қаупі өте жоғары. Көп жағдайда бұл дүмпулер климатқа байланысты тәуекелдермен өзара әрекеттеседі: жер сілкіністері көшкінге немесе мұздық көлдерінің жарылуына түрткі болуы мүмкін. Сондықтан менің үндеуім — тәуекелдерді басқаруда көп тәуекелді тәсілді және кешенді тәсілді қолданайық», — деп ұсынды спикер.

Сондай-ақ, ол өз сөзінде өңір үшін үш негізгі тәсілді атап өтті: тәуекелдерді итеративті бағалау (деректерді әр бес жыл сайын қайта қарау), тәуекелдерді әртараптандыру (әсіресе ауыл шаруашылығында) және инфрақұрылымды күнделікті басқаруды күшейту.